Dr.Gëzim Kelmendi – Intervistë për portalin Gazeta Express
Intervistë me Gëzim Kelmendin
Prishtinë | 7 Mars 2014 | Portali Express
Jemi duke u përgatitur të shkojmë në zgjedhje të vetëm, por nuk përjashtojmë as koalicionet parazgjedhore. Shumica e politikanëve e sidomos udhëheqësit e shtetit janë servilë dhe e mohojnë identitetin e tyre. Kosovës nuk i duhen “Gay paradat” pasi homoseksualët janë të sëmurë. Ashtu siç e ka thënë edhe Kryeministri Skënderbeu ishte “Atlet i Krishtit” dhe rrjedhimisht edhe hero fetar. Nënë Tereza ishte humaniste. Nënkryetari i Partisë së Drejtësisë, Gëzim Kelmendi flet për Express.
Express: Ku është Partia e Drejtësisë pak muaj para zgjedhjeve nacionale?
G. Kelmendi: Partia e Drejtësisë është më e përgatitur se në të kaluarën. Kemi edhe një rritje në bazë të rezultatit të 3 nëntorit 2013. Mendoj se jemi mjaft të konsoliduar dhe të gatshëm të hyjmë në garën për zgjedhjet nacionale. Kemi një konsolidim të Degëve në përgjithësi. Kemi një rritje të Nëndegëve, por edhe një motivim të anëtarësisë së gjerë në nivel të Kosovës. Prandaj, ne jemi të gatshëm të ballafaqohemi me sfidën e zgjedhjeve të ardhshme nacionale.
Express: Me cilën parti planifikoni të bëni koalicion parazgjedhor apo do të shkoni si parti e vetme në zgjedhje?
G. Kelmendi: Fillimisht, jemi duke u përgatitur të shkojmë vetë në zgjedhje, përndryshe jemi të hapur edhe ndaj partive të tjera. Mirëpo, për momentin ne aktivitetet që jemi duke i zhvilluar si Partia e Drejtësisë jemi duke u përgatitur që garës t’i hyjmë vetë, por megjithatë ende është herët për një vendim të tillë.
Express: Me cilën prej partive politike jeni më afër për të bërë koalicion?
G. Kelmendi: Konkretisht nuk kemi bisedime konkrete sa i përket koalicioneve parazgjedhore. Jemi të hapur për të gjithë, por aktualisht jemi duke u përgatitur që të shkojmë si Partia e Drejtësisë. Por, ende s’ka diçka konkrete sa i përket koalicioneve.
Express: Sa është e mundshme që Partia e Drejtësisë të lidh koalicion me LISBA’në e Fuad Ramiqit?
G. Kelmendi: Thash, që në parim, sa i përket koalicionit parazgjedhore nuk kemi biseda konkrete e as si subjekt përveç që ditëve të kaluara Kryetari i PD’së ka pasur takim me Kryetarin e LDK’së. Ndoshta në të ardhmen do të vazhdojnë takimet me Kryetarët e subjekteve tjera, të cilët janë të hapur të bashkëpunojnë me Partinë e Drejtësisë.
Express: A keni ndonjë ofertë prej partive tjera për koalicion parazgjedhor?
G. Kelmendi: Ofertë të drejtpërdrejtë nuk kemi. Kemi vetëm takime të cilat kanë qenë në frymën e mirëkuptimit dhe bashkëpunimit të ardhshëm. Por, jo sa i përket koalicioneve parazgjedhore siç ishte takimi i para disa ditëve me Kryetarin e LDK’së, ndërsa me partitë tjera ende s’kemi pasur takime në frymën e tillë sa i përket koalicioneve parazgjedhore. Ne ende mbesim të hapur për bisedime dhe me gjithë ata që e pranojnë programin e PD’së ne jemi të hapur që t’i fillojmë bisedimet për koalicion.
Express: Pra, nuk e përjashtoni mundësinë e një koalicion me LISBA’në?
G. Kelmendi: Në takimin e fundit që kemi pasur në Kryesinë e PD’së, ne jemi duke u konsoliduar për të hyrë në garën zgjedhore në zgjedhjet e ardhshme nacionale si Parti e Drejtësisë. Por, ne mbesim të hapur edhe për koalicion parazgjedhore.
Express: Ish-deputeti i PD’së, Amir Ahmeti e ka themeluar një Nismë të re, me të cilën do të garon në zgjedhje. A do t’i bashkoheni kësaj nisme?
G. Kelmendi: Sa më takon mua, unë jam në PD, jam Nënkryetar i PD’së në Qendër dhe Kryetar i Partisë së Drejtësisë në Pejë. Aktivitetin tim jam duke e ushtruar dhe edhe në të ardhmen do ta ushtroj brenda PD’së.
Express: Po kthehemi të projektligji i Ministrisë së Ambientit për ‘zhurmat’. Pse reaguat për këtë ligj?
G. Kelmendi: E keni parë edhe ju se një ligj i cilinë mënyrë mjaftë dinake u mundua të përvidhet ai nen, i cili cilëson pajisjet akustike të objekteve fetare, qoftë ezanin, qoftë kambanat, i cilësonte si burime të zhurmës. Dhe, padyshim, për neve si qytetarë dhe si besimtarë është i papranueshëm që thirrjet e tilla e cilat fetare, qoftë ezani, qoftë kambanat të cilësohen si burime të zhurmës. Edhe pse po e them një Ligj i tillë për zhurmën është konform me normat e BE dhe është i mirëpritur për ne për shkak se për çdo ditë ballafaqohemi me zhurma të ndryshme. Por, qëndrimi im edhe në Kuvend, edhe në debat, që Ligji të jetë i tillë çfarë e kanë edhe vendet e BE’së, ku burimet e zhurmës të cilëson ashtu siç janë. Por, nuk gjeni në asnjë vend të BE’së që në ligjet e tyre të cilësojnë si burim i zhurmës pajisjet akustike fetare.
Express: Megjithëkëtë, në Bashkësinë Islame kanë konfirmuar se janë konsultuar me Ministrinë dhe deklaruan se gjithçka ishte në rregull?
G. Kelmendi: Mendoj se vizita e Ministrit në Bashkësinë e Islame flet më shumë se flasim ne ngase ai e kishte parë një ndjekje të përgjegjësisë që kishte shkaktuar me qëllimin e tij duke polarizuar situatën në Kosovë dhe duke nxitur debate qoftë brenda Kuvendit, qoftë edhe jashtë Kuvendit. Vizita e tij në Bashkësinë Islame është argument se ai e ka parë gabimin e tij që e ka bërë me veprimin e tij. Ai ka premtuar personalisht se do ta riformuloj Ligjin. Kjo lë të kuptohet se diçka nuk ka qenë e mirë në atë Ligj. Edhe reagimi jonë ka qenë për shkak se s’ka qenë diçka e mirë dhe nuk e kemi pranuar si të tillë.
Express: Para pak ditësh u dënuan disa persona për shkak se e kishin penguar një tubim publik të një reviste që fliste për seksin. Cili është vlerësimi juaj për këtë dënim?
G. Kelmendi: E kam pasur edhe një debat sa i përket asaj situate. Mendoj se në këtë rast drejtësia është treguar e njëanshme. Kemi pasur gjatë tërë viteve skena të tilla të prishjes së organizimeve. Duhet të përmendim edhe rastin e prishjes së organizimit të përurimit të autostradës që na lidh me Shqipërinë. Atë ditë disa protestues të pakënaqur me disa arrestime prishën organizimin dhe tribunën, ku me atë rast Kryeministri i Kosovës dhe ai i Shqipërisë u deshëm të kthehen prapa. Asgjë konkrete nuk është marrë në atë rast. Po e pyes edhe vetën pse këto standarde të dyfishta? Po mendoj se këtu kemi probleme me vetveten si klasë politike. Jemi shumë inferiorë ndaj identitetit tonë dhe klasa politike është inferiore ndaj identitetit të vetë. Ndjehet keq në momente të caktuara të tregoj se kush është dhe e dyta kemi një klasë politike servile, i cili është shumë i rrezikshëm për vendin.
Express: Por, nuk janë të gjithë servilë?
G. Kelmendi: Jo të gjithë, por një pjesë e politikës, e në veçanti ata që e udhëheqin shtetin janë servilë dhe kjo është duke na kushtuar shumë sepse ne duhet të kemi një sistem parimor politik e jo servil. Mendoj se servilizmi dërgon te standardet e dyfishta, ku njeriu është i gatshëm të shtyp identitetin për të arritur qëllimet e veta dhe të veproj kundër popullit të vetë.
Express: Më 14 shkurt në ditën e të dashuruarve disa femra u puthën midis Prishtinës… cili është vlerësimi i juaj nëse në Kryeqytet organizohet një “Gay paradë”?
G. Kelmendi: Mendoj se ‘gay parada” në vendin tonë, për popullin tonë, nuk është e pranueshme. Po flasim konkretisht, ne e kemi një Kushtetutë të Republikës së Kosovës dhe i kemi ligjet kundër diskriminimit ku garantohen të drejtat e tyre. Ata nuk kanë nevojë të provokojnë ndjenjat e qytetarëve të këtij vendi. Për faktin se të drejtë për organizim të paradës kanë ato kategori të vendit që janë krenaria e popullit, qoftë Forcat e Armatosura, qoftë Policia.
Express: Por, për dikë edhe ‘Gay parada” është krenari?
G. Kelmendi: Jo nuk janë ata krenaria. E kam thënë publikisht dhe e them edhe një herë se ata janë njerëz të sëmurë dhe kanë probleme. Ajo është sëmundje. Kam edhe diplomën mjekësore dhe e mbroj në aspektin njerëzor dhe nuk shkeli mbi parimet e mia profesionale si mjek. Se ata janë një kategori e njerëzve të sëmurë, ku shteti duhet t’iu siguroj shërim të tyre, rehabilitim të tyre dhe jo promovim të një sëmundje dhe degjenerimi të tillë.
Express: Kështu nuk konsiderohen në vendet e BE’së?
G. Kelmendi: Unë e kam edhe legjislacionin e BE’së ku të gjitha vendet e BE’së ua ndalojnë homoseksualëve të dhurojnë gjak. Me vetë faktin se atyre u ndalohet dhënia e gjakut tregon rrezikshmërinë që kanë në popull. Se ata janë bartës potencial të sëmundjeve seksuale e në veçanti HIV’it. Përderisa një kategori e tillë është e privuar nga dhënia e gjakut dhe janë bartës potencial të sëmundjeve të ndryshme si mund të jenë ata krenaria e një populli për të defiluar nëpër qytet.
Express: Por, Kushtetuta e Kosovës ua lejon edhe martesën?
G. Kelmendi: Jo, Kushtetuta e Kosovës e ka lënë të hapur këtë çështje. Ju garanton të drejtat e tyre, por Ligj për martesë të tyre Ligj nuk ka.
Express: Por, askund nuk iu ndalohet?
G. Kelmendi: Ligj konkret nuk ka. Ligjin për martesë të gjinisë së njëjtë nuk e kemi ashtu siç e kanë disa vende tjera. Kosova ende s’e ka një ligj të tillë. Ne si popull me një traditë të tillë nuk është e pranueshme t’i shohim publikisht duke u puthur apo duke provokuar ndjenjat e popullit. Prandaj, mendoj se ata e kanë Kushtetutën, e kanë Ligjin dhe nëse janë persona të tillë, ata askush nuk i privon prej të drejtave të tyre. Unë kurrë nuk thirri që ata të sulmohen. Shteti duhet të ketë një qasje tjetër ndaj tyre dhe të merret seriozisht. Të trajtohen ashtu siç meritojnë të trajtohen dhe t’i rehabilitoj dhe fundi i fundit mos të jenë ata kategori që provokojnë gjithmonë polarizim të situatës në Kosovë.
Express: Ish-kolegu juaj Amir Ahmeti në një debat televiziv ka thënë se i duhen një muaj për të dhënë një vlerësim për Nënën Terezë dhe Skënderbeun. Cili është vlerësimi juaj për këto dy figura shqiptare?
G. Kelmendi: Kam dhënë qëndrimet e mia. Qëndrimet e mia kanë qenë të bazuara në shkrime dhe libra historike të historianëve vendorë dhe botërorë. Nuk ka qenë mendim i imi profesional, por jam bazuar në qëndrimet e historianëve.
Express: A është hero kombëtar Skënderbeu?
G. Kelmendi: E kam thënë në vazhdimësi se unë kam të drejta si qytetar i këtij vendi të bazohen në historianë të caktuar dhe të kam preferenca ta caktuara dhe duke qenë se pjesa dërmuese e historianëve, edhe vendor, edhe ndërkombëtarë, Skënderbeun nuk e cilësojnë si hero kombëtar, por e cilësojnë si hero kombëtar. Është anatemim ipadrejtë nga mediat e ndryshme, qoftë portale, të cilësohet se Gëzimi ka dhënë një deklaratë të tillë skandaloze. E keni edhe deklaratën e Presidentes së Kosovës, edhe të Kryeministrit, i cili në rrjetin social e cilëson Skënderbeun si atlet të krishterimit. Nëse unë them se Skënderbeu është hero fetar dhe Kryeministri thotë se është “Atlet i krishterimit”, kjo nuk dallon.
Express: Por “Atlet i Krishterimit është” gradë që i është dhënë prej Vatikanit?
G. Kelmendi: Pse ju ka dhënë ajo gradë? Grada ju ka dhënë se ka luftuar për krishterim. Duhet ta kuptojmë një gjë nëse unë them se është hero fetar nuk e kam ofenduar askënd. Ju keni plotë shkrime të historianëve, të cilët edhe fyejnë Skënderbeun. Unë asnjëherë nuk e fyej askënd qoftë të feve apo kombeve të ndryshme. Vetëm kam dhënë një mendim që është i bazuar në argumente historike.
Express: Po për Nënën Terezë cili është qëndrimi juaj?
G. Kelmendi: Qëndrimi im është se ajo ka qenë një humaniste, e cila ka kontribuar dhe pjesën më të madhe ka kontribuar jashtë vendit. Roli i saj është si humaniste. Ka vepruar përmes shoqatave të ndryshme.
Express: Ka njerëz në Kosovë që paralajmërojnë se vendi po rrezikohet nga ekstremizmi fetar?
G. Kelmendi: Kosova është e rrezikuar prej ekstremizmit laik e jo fetar. Në Kosovë s’ka ekstremizëm fetar. Dua ta potencoj deklaratën e State Departamentit Amerikan të Shtetit për vitin 2013 ku thuhet se Kosova është e rrezikuar nga ekstremizmi serb, kryesisht që vepron Veri të Kosovës. Pra, Kosova është e rrezikuar prej ekstremistëve serbë ndërsa edhe kemi deklarata të drejtorit të Policisë së Kosovës dhe State Departamentit Amerikan të Shtetit, ku askund nuk përmendet ekstremizmi fetar. Ekstremizmi fetar fatkeqësisht përmendet nga disa ekstremistë laik në Kosovë që janë thjeshtë pjesë e politikës dhe jopolitikës. Ata deshën apo nuk deshën janë duke bërë një politikë shumë të gabuar se Kosova dhe Shqipëria dhe ne si popull e kemi tolerancën shumë të lartë ndërfetare. Këtë duhet ta mbrojmë me çdo kusht. Këta ekstremistë laik janë duke e bërë të brishtë tolerancën dhe sulmojnë figura të ndryshme. Ata sot po i atakojnë figura të besimit islam dhe nuk përjashtohet mundësia që nesër të atakojnë figura të besimit krishterë.
Express: Ju e keni dëgjuar këngën e Gold AG me titullin “shqiptari”, e cila shkaktoi reagime të mëdha. Si e vlerësoni këtë këngë?
G. Kelmendi: Po e kam dëgjuar dhe mendoj qe përmes kësaj kënge ai ka paraqitur një realitet që ekziston në Kosovë përmes zhanrit “Rap” te cilin ai e interpreton. Ne te gjithë e dijmë se edhe në të kaluarën por edhe tash shumë këngëtarë përmes”Rapit’ përdorin edhe fjalët me banale dhe te ulëta që ndikojnë negativisht ne shoqërinë tonë, dhe askush për fjalorin e tyre të përdorur deri tash nuk ka reaguar. Ndërsa tash pa arsye polarizohet opinioni dhe kemi reagime te ndryshme. Ne si shoqëri duhet te jemi te drejtë dhe te gjykojmë drejt, e jo vetëm kur përmenden emrat e dikujt apo interesat e dikujt.